Xa pasou ao redor dun mes dende que botamos as sementes das diferentes especies medicinais e, inda que algunhas están moi desenvoltas, este ano, en xeral, lles está a costar agromar.

E iso a pesar de que, de xeito voluntario, os rapaces están a cumprir, en xeral, moi ben coas quendas para o regado.

 

Vai uns 15 días transplantamos os brotes a un recipiente maior e aproveitamos para facer, nas macetas aletargadas, unha 2ª sementeira… a ver se así conseguimos sacar máis plantiñas adiante.

O día do transplante foi moi intenso: había certos nervios por se mancabamos as plantas, pero todo saiu á perfección.  Ademais puidemos empregar o “compost made in Rosalía de Castro”!

Á fin viuse recompensado o pequeno esforzo que facemos, ao longo do curso, para recoller os restos orgánicos das merendas e levalos aos diferentes composteiros. Sempre é impactante ver no que se transforma o noso lixo orgánico… aquilo era terra… e cheiraba a terra! (seica sempre lles costa crer que nalgún momento a mole de residuos vai deixar de cheirar mal  🙂  ).

Seguimos esperando a que as nosas plantas medren un pouquiño máis, pero algúns alumnos xa conseguiron identificar a súa planta incógnita! Polo de agora sabemos que temos:  alfábega,  tomiño, dente de león, macela, verbena, ourego e cilantro… mais queda bastante por identificar.

Seguiremos informando.